PAILLARD

adjectif et substantif masculin

[T-L : paillart ; GD : paillart ; FEW (VII, 498a) : palea ; TLF (XII, 782a) : paillard]

A. -Valet d'écurie.

Consequemment gros varletz, muletiers, Rustaulx du train, conduyseurs de brouettes, Touche chevaulx, gros paillars, charretiers, Pietons, laquais, petiz flairemeuretes, Adventuriers, courretiers d'amourettes Qui n'avoyent pas dessous eulx grans tresors : Vela comment nostre armee pour lors Alla sercher Florence la gentille (La Vigne, V.N., p.1495, 219)

B. -Qui couche sur la paille.

1.[D'un animal]

Et ne veulles pas tant craindre de perdre deux paillardes charongnes comme sont tes chevaulx (RENÉ D'ANJOU, Mortif. Vaine Plais. R., 1455, 44)

2.(Celui) qui couche sur la paille ; d'où gueux, misérable, fripon, vaurien.

Et comment ne te souvient il Qu'elle [ta dame] dou tresmortel peril Ou tu estoies te getta Par les lettres qu'elle ditta, Et qu'elle t'a resuscité Deulz fois par grant humilité, Et te jetta hors d'orphanté, Et t'a rendu joie et santé Et ton amoureus sentement Qu'avoies perdu longuement, Et si t'a fait cointe et gaillart ? Et tu estoies un paillart Et iés, quar cuer has nice et rude, Plain de pechié d'ingratitude, Et chetif, dolereus et las, Quant [tu] remercié ne l'as Des grans honneurs et des biens fais Qui par elle t'ont esté fais. (Mach., Voir, 1364, 220)

Tout desvuet quanque je vueil Sa durté [de Fortune] Qui m'a miné ; Se n'ay regart Que tel joie me regart Comme avoir sueil, Eins recueil Par son orgueil Toute grieté, Quant je voy en haut degré Maint grant paillart, Maint coquart Et maint couart Par son escueil. (Mach., Les lays, 1377, 416)

Ce n'est q'un paillart affaittié, Qui deçoit de sa mauvaistié Ainsi les gens par son parler. (Mir. st Alexis, 1382, 347)

Mais d'une chose m'esbahi, Et a pou que je l'en hai : Qu'aucuns paillars mettoit devant Qui bons n'estoient ne savant (Chr. Piz., Chem. estude P., 1402-1403, 121)

Ung lasche paillard et recreant jaloux (...) ne savoit a qui recourre ne soy rendre pour trouver garison de sa dolente, miserable et bien pou plaincte maladie. (C.n.n., c.1456-1467, 85)

Est ce la belle salutacion que vous me faictes de m'appeller paillarde ? Je veil bien que vous le sachez que je ne suis pas telle ; mais trop bonne et trop loyale pour ung tel paillard que vous estes (C.n.n., c.1456-1467, 244)

...n'estois je pas homme pour avoir ce butin ou mieulx que ung paillard charreton qui ne fist oncques rien pour vous ? (C.n.n., c.1456-1467, 346)

...[le roi] manda aux garnisons et aussi des arbalestriers et archers de Paris et autres de ladicte ville, que messire Robert d'Estouteville, prevost de ladicte ville, conduisoit, qu'ilz alassent destruire lesdiz Bourguignons et place. Mais, incontinent qu'ilz en orent les nouvelles, ilz desemparerent tout et s'enfouirent, comme paillars qu'ilz sont. (Roye, Chron. scand., I, 1460-1483, 322)

Et, ce mesme jour, environ entre IX et X heures de nuit, se bouta le feu en l'un des moulins aux Musniers, de Paris, qui appartenoit au prieur de Saint-Ladre, et fut tout le comble d'icellui bruslé par ung paillart varlet musnier, qui avoit ataché une chandelle contre le mur de son lit, qui cheÿ dedens icellui lit et y brusla tout, reservé ledit paillart, qui se saulva et enfouy comme ung renart. (Roye, Chron. scand., I, 1460-1483, 202)

Ce monde n'est perpetuel, Quoy que pense riche pillart ; Tous sommes soubz mortel coustel : Ce confort prens, povre viellart, Lequel d'estre plaisant raillart Ot le bruyt, lors que jeune estoit, C'on tendroit a fol et paillart Si, viel, a raillier se mestoit. (Villon, Test. R.H., 1461-1462, 50)

Et s'entent que le demandeur sera creu par serment s'il est homme de bonne renommée et creable. Autre chose seroit si s'estoit ung homme de mauvais renon ou paillart (Cout. instit. Anjou Maine B.-B., t.3, 1463, 292)

J'aime mieulx non rien besoigner Que ces cloux faire, par mon ame ! Je seroye palhart infame, Si besoignhois pour Jhesus pendre. (Pass. Auv., 1477, 177)

Maulditz soyent les palhartz truans, Que si grans meschiefz ont fait faire ! (Pass. Auv., 1477, 270)

Ce peuple judayc mauldit M'a trahit Par son lenguacge desolable, Ensemble le palhart dïable, Qui nuysable Est es justes sans cesser (Pass. Auv., 1477, 278)

Et quant le paillart y saillit Il crioit comme ung enraigé. (B. veoir, p.1480, 20)

Et le paillart se raille Et tire son espee... (B. veoir, p.1480, 20)

Mais je pry a Dieu qu'on me pende Par la gorge de ce licol Que, se je tien le paillart fol, Je ly estaindray de si pres Que le sang en sauldra aprés, Par tout les joinctures des mains Et des poings. (Myst. Pass. Troyes B., a.1482, 680)

Et puis ces paillards boulengiers Qui vendoient sept ou huit deniers Le pain qu'on a present pour ung... (Sots gard., a.1488, 104)

Mais soubz umbre d'eulx, plusieurs paillars et meschans gens qui conduysoient et menoient les dictz bagaiges, firent la plus grant partie du dict pillage, et rompoient les coffres et bahus de leurs dictz maistres pour prendre ce qui estoit dedens. (La Vigne, V.N., p.1495, 290)

Se c'une fois de mes griffes j'agrappe, J'amayne tout par dessoubz ton poulpitre : Paillars abbez, sucrez soubz riche tiltre Et evesques pour faire chiere baulde, Qui despendent relique, croce, mytre A l'environ d'une vielle ribaulde. (La Vigne, S.M., 1496, 225)

En particulier. [Pour désigner ceux qui suivent une armée dans un dessein de pillage, au masc. et au fém.]

En nostre ost y avoit grant sequelle de paillars et paillardes a pied, qui firent le dommaige des morts. (Comm., Mém. B., 1497-1498, 644)

[Comme insulte]

Passe, passe, truant, paillart, Vuide ma porte. (Mir. Pierre Changeur, c.1378, 236)

...[il] dist : 'Paillarde, meschante que vous estes... !' (C.n.n., c.1456-1467, 244)

Et je feray, dit le curé, voz fievres quartaines, paillarde que vous estes, qui tant estes et orde et sale et malhonneste ! (C.n.n., c.1456-1467, 301)

Et estoit escript et enregistré le lieu où avoient esté prins lesdiz oiseaulx et aussi tout ce qu'ilz savoient dire, comme : Larron ! Paillart ! Filz de putain ! Va hors, va ! Perrete, donne moy à boire ! et plusieurs autres beaux motz que iceulx oiseaux savoient bien dire et qu'on leur avoit aprins. (Roye, Chron. scand., I, 1460-1483, 220)

Palhart, tay toy, Ou je te tuarey cy tout mort ! (Pass. Auv., 1477, 204)

Pauvre paillard. Pauvre bougre.

Et dedens les vignes près Saint-Anthoine des Champs furent prins bien XX ou XXIIII povres paillars Calabriens et Bourguignons tous nuz et mal en point, qui furent venduz au butin, et en donnoit on quatre pour ung escu, qui est audit pris VI sous VI deniers parisis la piece. (Roye, Chron. scand., I, 1460-1483, 108)

[D'un animal] Sale, ignoble.

'A qui parlez vous, m'amye ? - C'est a ce paillard chien, madame, qui m'a fait tant de peine de le querir...' (C.n.n., c.1456-1467, 196)

3.[D'une chose] Sale, répugnant.

...je n'aroye cueur ne courage de vous faire bonne chere avec ces paillards houseaulx. (C.n.n., c.1456-1467, 157)

Pour tes maulx palhars tu es nostre ; Jamaiz tu ne sauldras du feu ! (Pass. Auv., 1477, 251)

PROSERPINE (en s'en fuyant). Haro, haro, l'eure et le jour mauldis De ta paillarde, orde nativité Et, avec ce, le belistre interdis Qui ad ce faire m'a premier invité ! Oncques deable ne fut plus tourmenté Que je seray, mais qu'en enffer je viengne (La Vigne, S.M., 1496, 482)

C. -(Celui/celle qui est) débauché, dévergondé.

...Orgueil trebuchera qui si hault y veult monter, Ire la forcenee n'i pourra demourer, Luxure, la paillarde, et Gloutonnie, la soullarde, et autres Vices mauvais n'i pourront dedens entrer. (Gers., Pent., p.1389, 74)

Laquelle femme le print en son amour desordonnée et, pour l'entretenir, en vendit et engaiga de ses bagues et vaisselle de sondit mary, et si print aussy de l'argent de sondit mary larcineusement pour l'entretenement de sondit paillard. (Roye, Chron. scand., II, 1460-1483, 115)

Je suis paillart, la paillarde [la Grosse Margot] me suyt. Lequel vault mieulx ? Chacun bien s'entressuyt, L'un vault l'autre, c'est a mau rat mau chat. (Villon, Test. R.H., 1461-1462, 126)

Et lors ledit suppliant laissa aller icelle Matheline, laquelle en soy en allant dist à haulte voix que ledit suppliant n'estoit que ung paillart et que il lui avoit baillé ledit escu en entencion d'avoir sa compaignie charnelle, en disant oultre que le matin il lui avoit à ceste fin voulu bailler une verge d'or. (Doc. Poitou G., t.12, 1475, 26)

Seulement demande l'esmende De l'offence de Jehan prophete, Qu'a dit que je suis deshonneste, Palharde, ribaulde, putain. (Pass. Auv., 1477, 96)

Il n'est mal que palhart ne face Quant putain le tient estaché. (Pass. Auv., 1477, 100)

Mignon, homosexuel passif.

...je t'ay mainteffoiz deschaucié et fourby tes soulliers du temps que tu fuz escuier et tu me faisoiez tenir tellement comme se j'eusse esté ton paillart (Chron. Rich. II, W., c.1400-1420, 98)